Descripción
A tan só dez minutos en coche da capital galega atópase a fronteira natural entre esta e o concello de Trazo: O río Tambre, ao seu paso por Chaián. Na marxe dereita, a beira tracense, revélase a carballeira reconvertida en área de lecer. E, sobre todo, de tranquilidade.
A ribeira conforma unha ruta para sendeirismo, que se adorna con pontes de madeira e unha área de descanso.
Pese ao frío no inverno, a imaxe deste lugar de Chaián evoca o outono. Un manto de follas secas, serve de alfombra a un paseo, seguindo o curso do río. A ruta, apta para o sendeirismo, adórnase con pontes de madeira. A cor marrón de troncos e follas -tamén de castaño- caducas rompe só co verde que, a pesar da estación do ano, aínda conservan algunhas ramas, descolgadas a moi poucos centímetros do caudal, vindo a máis, do río.
Pola contra na primavera ou verán podemos camiñar tranquilamente á sombra da numerosa vexetación e gozar do unha completa paisaxe verde.
Xa de volta á ponte de Chaián, reaparece o ruído, ausente, a excepción do das augas, durante toda a ruta. A zona máis transitada deste espazo, a área de recreo. Conta con numerosas mesas para gozar nelas dunha comida ao aire libre, para o que se construíron tamén asadores de pedra. En comuñón coa contorna, todas as demais construcións son de madeira, incluídas papeleiras, colectores, aseos e, por suposto, o bar, que permanece pechado durante o inverno.
