Descripción
O Tambre regala un dos seus mellores recantos en Chaián, a área de lecer pública coa súa propia praia fluvial. Aquí pódese pescar ou simplemente deixarse levar polo verdadeiro significado do termo descanso á sombra da frondosa vexetación de carballos, ameneiros e castiñeiros. As camiñadas por estes contornos naturais constitúen o maior aliciente para o turismo rural e en Trazo non faltan oportunidades para gozar deste tipo de viaxe alternativa, onde o descanso, o contacto coa natureza, a práctica de deportes e os xogos populares, xunto co goce da gastronomía tradicional, son a mellor terapia contra o acelerado balbordo dos novos tempos.
En Chaián a man do home fixo máis transitables unhas ribeiras de ensoño, onde o Tambre non é o único protagonista. A frondosidade das súas ribeiras, con carballos e alisos centenarios, é extraordinaria. É un lugar idóneo para disfrutar da natureza, para bañarse no verán ou ir de pesca na primavera, que din que aquí hai excelentes troitas. Unha carballeira rehabilitada como merendeiro e pequena praia fluvial dende 1992, cuxa vexetación salvaxe promete relaxantes camiñatas e o descubrimento de espazos virxes.
As augas deste río, que regan esta gran comarca agrícola, son testigo e espello neste tramo no mes de xullo da tradicional Festa do Escalo, porque o Tambre, ademais de en vexetación, tamén é rico en numerosa fauna.